Description
Dan ir-rumanz jibda bl-imħabba u jispiċċa bl-imħabba. U min ma jħobbx jaqra dan is-suġġett? Għax fid-dinja m’hawn xejn isbaħ u li jhenni qalb il-bniedem aktar mill-imħabba.
B’dankollu ilkoll li aħna nafu li f’din id-dinja ma’ kull warda ssib ix-xewk li spiss jaqtgħalek qalbek li tersaq lejn il-warda. Imma l-warda hemm tkun tħajjar lill-qalbieni bi fwieħitha u d-dehra sabiħa tagħha biex irabbi l-kuraġġ ħalli jitpaxxa biha, ukoll jekk dan ifisser xi tingiża kiefra.
Għandna l-istorja ta’ Marina, xbejba li trabbiet Il-Melliħa taħt il-madmad ta’ missier bla qalb u bla raġuni, li jaħsibhiex darbtejn biex isawwatha. X’hemm lest għal dit-tfajla li għaddiet tfulitha taħt din is-sħaba sewda?
Hemm għaliha ġejjieni mżewwaq bi ġrajjiet li qatt ma basret li għad tidħol fihom. Niltaqgħu mhux biss mz’ missierha u ommha, imma ma’ żewġ zijiet ċikka u Toni li jadurawha, ma’ Grezzja, ġara zekzieka li ma taħmilhiex, mal-ewwel guvnott li tintilef warajh, ma’ Dun Renato li jiddefendiha, ma’ Patri ċ użepp li jifhimha, mal-Arċipriet li mingħajr ma ried weġgħalha qalbha, ma’ Peter u martu Julia. Dawn kollha flimkien jitgħaqqdu f’kobba mħabbla li fin-nofs tagħha tinsab Marina. Għad fl-aħħar issib min iħobbha b’imħabba serja u altruista?
F’din l-istorja ma nsibux ġrajjiet ta’ avventuri kbar u drammatiċi. Hija rakkont dwar l-inċidenti żgħar li nħabbtu wiċċna magħhom kuljum, u li għalkemm nqisuhom bla siwi, fuq kollox huma l-ħarira li biha ninsġu l-arazz ta’ ħajjitna. Drabi l-ħarir jidher mitfi u bla lewn, waqtiet oħra jkun dehbi u mimli bl-ilwien tal-imħabba u tal-ħajja.
Reviews
There are no reviews yet.