Description
Tifkiriet: Minn Fomm il-Poplu hija pubblikazzjoni ġdida bbażata fuq intervisti li l-awtur Gordon Caruana għamel ma’ Maltin dwar Ħajja, Ħidma, Rikreazzjoni, Gwerra u temi oħra interessanti fuq il-ħajja soċjali tal-Maltin tal-aħħar 70 sena.
Din il-kitba ġiet imnebbħa mis-semmiegħa tal-programm radjufoniku Tifkiriet, li din is-sena jfakkar l-20 sena tiegħu.
Imqassma f’sitt kapitli, b’24 rakkont ta’ esperjenzi mill-imgħoddi, u bil-parteċipazzjoni ta’ madwar 80 persuna oħra, dawn il-memorji orali jeħduna lura fiż-żmien meta l-ħajja kienet aktar sempliċi u ta’ tbatija.
Mit-tfulija ta’ presidenti emeriti, l-iskola u l-ewwel tqarbina, għall-ħidma tal-bejjiegħa tal-ħalib u tal-pitrolju. Mis-sengħa tat-taħħan u l-ġabbar tal-melħ għall-iskultura fl-għamara. Mill-bżulija tat-tarznari u s-seħer tat-talkies, għall-esperjenzi ta’ sid il-ħanut tat-te, tal-messaġġier u x-xogħol ta’ suldat fil-gwerra.
Din hija nisġa ta’ tifkiriet minn fomm il-poplu li mhux biss għandha għan nostalġiku, imma turina minn x’hiex għaddew ta’ qabilna biex ksibna dak li qed ingawdu llum.
